என்எல்சிஐஎல் தலைவர் மற்றும் மேலாண் இயக்குநர் பிரசன்னகுமார் மோட்டுபள்ளிக்கு புகழ்பெற்ற "ஐன்ஸ்டீன் உலக சாதனை" அங்கீகாரம் வழங்கப்பட்டது!

என்எல்சிஐஎல் தலைவர் மற்றும் மேலாண் இயக்குநர் பிரசன்ன குமார் மோட்டுபள்ளிக்கு புகழ்பெற்ற "ஐன்ஸ்டீன் உலக சாதனை" அங்கீகாரம் வழங்கப்பட்டது! 

     நெய்வேலி, ஜுலை 01-நெய்வேலி நகரப் பள்ளி மாணவர்களுக்கான  இலவசப் பேருந்து திட்டத்திற்காக 'ஐன்ஸ்டீன் வேர்ல்ட் ரெக்கார்ட்ஸ்' அமைப்பு அங்கீகாரம் வழங்கி கௌரவம்! 

நெய்வேலியில் நேற்று (30.06.2026) வட்டம்-11-இல் உள்ள ஏ.பி.ஜே. அப்துல் கலாம் அரங்கில் நடைபெற்ற முப்பெரும் விழாவில், ஆயிரக்கணக்கான பள்ளி மாணவர்கள், ஆசிரியர்கள் மற்றும் உயர் அதிகாரிகள் முன்னிலையில் இந்த உயரிய சர்வதேச அங்கீகாரம் அவருக்கு வழங்கப்பட்டது.

     மாணவர்களின் பயணத்தில் புதிய மைல்கல்

கடந்த 2024 ஆகஸ்ட் மாதம் பிரசன்ன குமார் மோட்டுபள்ளியின் நேரடித் தொலைநோக்குப் பார்வையில் தொடங்கப்பட்ட இந்த இலவச பேருந்து சேவை திட்டமானது, நெய்வேலி நகரப் பள்ளி குழந்தைகளின் தினசரிப் பயணப் பாதுகாப்பை உறுதி செய்துள்ளது. கட்டணமில்லா இந்தச் சேவை, ஏழை மற்றும் நடுத்தரக் குடும்பங்களின் பெரும் நிதிச் சுமையைக் குறைத்துள்ளதோடு, தரமான கல்விக்கான எளிமையான அணுகலையும் சாத்தியமாக்கியுள்ளது.

    இந்த விழாவில் ஐன்ஸ்டீன் உலக சாதனை அமைப்பின் இணை நிறுவனர் டாக்டர் ஜே. மோனிகா ரோஷினி கலந்து கொண்டு, பாராட்டுச் சான்றிதழை வாசித்து இந்த அங்கீகாரத்தை  பிரசன்ன குமார் மோட்டுபள்ளி அவர்களுக்கு  வழங்கினார். 

        அப்போது பேசிய அவர்:

"ஆயிரக்கணக்கான குழந்தைகளுக்கு நேரடியாகப் பயனளிக்கும் இத்தகைய நெகிழ்ச்சியான, சமூகத் தாக்கம் மிக்க முடிவை எடுத்த என்எல்சி இந்தியா நிறுவனத்தின் தலைமைப் பண்பு வியக்கத்தக்கது. இரக்கமும், சமூக அர்ப்பணிப்பும் கொண்ட ஒரு சிறந்த தலைவராக விளங்கும்  பிரசன்ன குமார் மோட்டுபள்ளி அவர்களை மாணவர்கள் தங்களது முன்மாதிரியாகக் கொண்டு பெரிய இலக்குகளை நோக்கி நகர வேண்டும்" என்று குறிப்பிட்டார்.

        நெகிழ்ச்சியூட்டிய நேரடிச் சாட்சியங்கள் விழாவின் ஒரு பகுதியாக, நெய்வேலி வட்டம்-11 பெண்கள் மேல்நிலைப் பள்ளி மாணவி ஒருவர் பேசுகையில், "இந்த இலவசப் பேருந்து திட்டம் எங்களைப் போன்ற மாணவிகளுக்குப் பெரும் பாதுகாப்பையும், எங்கள் பெற்றோருக்குப் பொருளாதார நிம்மதியையும் தந்துள்ளது. தினமும் சரியான நேரத்திற்குப் பள்ளிக்கு வர முடிகிறது," என நெகிழ்ச்சியுடன் தனது நன்றியைப் பதிவு செய்தார்.

         அதே பள்ளியைச் சேர்ந்த ஆசிரியை ஒருவர் பேசுகையில், இந்த இலவசப் போக்குவரத்து வசதி வந்த பிறகு, குறிப்பாக பெண் பிள்ளைகளைப் பள்ளிகளில் சேர்க்க பெற்றோர்கள் மிகுந்த ஆர்வம் காட்டி வருவதாகவும், இது கல்விச் சமத்துவத்தை நெய்வேலியில் அடுத்த கட்டத்திற்கு எடுத்துச் சென்றுள்ளது என்றும் பாராட்டினார்.

          "இது என்எல்சி குடும்பத்தின் கூட்டுச் சாதனை" - சி.எம்.டி பெருமிதம்.    இந்த அங்கீகாரத்தை ஏற்றுக் கொண்டு உரையாற்றிய என்எல்சி இந்தியா நிறுவனத்தின் தலைவர் மற்றும் மேலாண் இயக்குநர் திரு பிரசன்ன குமார் மோட்டுபள்ளி, இந்த அங்கீகாரத்தை ஒட்டுமொத்த நிறுவன ஊழியர்களுக்கும் ஆசிரியர்களுக்கும் அர்ப்பணிப்பதாகத் தெரிவித்தார். மேலும், அவர் பேசுகையில்:

இந்த உயரிய அங்கீகாரம் என்பது ஒரு தனிநபரின் சாதனையல்ல; மாறாக, ஒட்டுமொத்த என்எல்சி இந்தியா குடும்பத்தின் கூட்டு அர்ப்பணிப்புக்குக் கிடைத்த வெற்றியாகும். எந்த ஒரு உன்னதமான முயற்சியும், நமது நிறுவன இயக்குநர்கள், பணியாளர்கள், ஆசிரியர்கள், அதிகாரிகள், தொழிலாளர்கள் மற்றும் அவர்தம் குடும்பத்தினரின் முழுமையான ஆதரவோடுதான் முழு வெற்றி பெறுகிறது. என்எல்சி இந்தியா நிறுவனத்தைச் சமூக அக்கறையுடனும், தொலைநோக்குப் பார்வையுடனும் சேவை செய்யும் ஒரு உன்னத அமைப்பாகத் தொடர்ந்து வழிநடத்தி வரும் அவர்களின் கூட்டுப் பணிக்கும், பகிரப்பட்ட நோக்கத்திற்கும் இந்த அங்கீகாரத்தை நான் நன்றியோடு அர்ப்பணிக்கிறேன்," என்று அவர் பெருமிதத்துடன் குறிப்பிட்டார். 

         கவனம் ஈர்த்த 'முப்பெரும் விழா'. இன்றைய நிகழ்வு வெறும் விருது வழங்கும் விழாவாக மட்டுமின்றி, என்எல்சி இந்தியா நிறுவனத்தின் மூன்று முக்கிய மைல்கற்களைக் கொண்டாடும் 'முப்பெரும் விழாவாக' அமைந்தது. 

         இதில் முதலாவதாக, நிறுவனத்தின் தலைவர் மற்றும் மேலாண் இயக்குநர் பிரசன்ன குமார் மோட்டுபள்ளி அவர்களுக்கு, புகழ்பெற்ற 'ஐன்ஸ்டீன் உலக சாதனை' அங்கீகாரம் வழங்கி கௌரவிக்கப்பட்டது. 

          அதனைத் தொடர்ந்து, நிறுவனத்தின் கற்றல் மற்றும் மேம்பாட்டு மையத்தின்  வாயிலாக சர்வதேசத் தரத்திலான 'ஐபிஎம்ஏ(IPMA) லெவல்-சி' சான்றிதழை வெற்றிகரமாகப் பெற்ற அதிகாரிகளுக்குப் பாராட்டுக்கள் தெரிவிக்கப்பட்டன. இறுதியாக, சமீபத்தில் புதுச்சேரியில் நடைபெற்ற 'தரக் கட்டுப்பாட்டு மன்ற (QCFI) மாநாட்டில்' கலந்து கொண்டு, உயரிய 'பிளாட்டினம் விருதுகளை' வென்று சாதனை படைத்த என்எல்சிஐஎல்-இன் தரக் கட்டுப்பாட்டு குழுக்களுக்கு (Quality Circle Teams) சிறப்பு கௌரவமும், பாராட்டுக்களும் வழங்கப்பட்டன.     

        இம்முப்பெரும் விழாவானது,  என்எல்சி நிறுவனத்தின் கல்விச் சிறப்பு, தலைமைத்துவ மேம்பாடு மற்றும் தரமான பெருநிறுவன கலாச்சாரத்தை வெளிப்படுத்தும் விதமாக அமைந்திருந்தது. 

என்எல்சி இந்தியா நிறுவனத்தின் கல்வித் துறை, நிறுவன தகவல் தொடர்புகள் துறை மற்றும் கற்றல் மற்றும் மேம்பாட்டு மையம் (L&DC) ஆகியவை இணைந்து இந்த பிரம்மாண்ட விழாவினை மிகச் சிறப்பாக ஒருங்கிணைத்திருந்தன. 

         இதில் நெய்வேலி ஆண்கள் மற்றும் பெண்கள் மேல்நிலைப் பள்ளிகளைச் சேர்ந்த நூற்றுக்கணக்கான மாணவர்கள் கலந்து கொண்டு விழாவை சிறப்பித்தனர்.